Wednesday, 30 September 2015

ಪಾಲಿಸಿ ಹಣ ನೀಡಲು ತಿರಸ್ಕಾರ : ಪರಿಹಾರ ನೀಡಲು ಆದೇಶ

ಕೊಪ್ಪಳ, ಸೆ.30 (ಕರ್ನಾಟಕ ವಾರ್ತೆ) : ಪಾಲಿಸಿದಾರನ ಉದ್ಯೋಗ ಮತ್ತು ಆದಾಯ ವಿವರವನ್ನು ಸಮರ್ಪಕವಾಗಿ ನೀಡಿರುವುದಿಲ್ಲ ಎಂಬ ಒಂದೇ ಕಾರಣದಿಂದ ಪಾಲಿಸಿ ಹಣವನ್ನು ನೀಡಲು ತಿರಸ್ಕರಿಸಿದ ಕೋಟಕ್ ಮಹಿಂದ್ರಾ ಓಲ್ಡ್ ಮ್ಯೂಚಲ್ಸ್ ಇನ್ಶೂರೆನ್ಸ್ ಲಿಮಿಟೆಡ್, ಮುಂಬೈ ಎಂಬ ವಿಮಾ ಕಂಪನಿಯ ಸೇವಾ ನ್ಯೂನ್ಯತೆಯನ್ನು ಪರಿಗಣಿಸಿರುವ ಕೊಪ್ಪಳದ ಜಿಲ್ಲಾ ಗ್ರಾಹಕ ವ್ಯಾಜ್ಯಗಳ ವೇದಿಕೆಯು ಪರಿಹಾರ ಒದಗಿಸಲು ಆದೇಶಿಸಿದೆ.
     ಪ್ರಕರಣದ ವಿವರ ಇಂತಿದೆ. ಕೊಪ್ಪಳ ಜಿಲ್ಲೆ ಗಂಗಾವತಿ ತಾಲೂಕಿನ ಶ್ರೀರಾಮನಗರದ ಭೀಮಪ್ಪ ಭೀಮಯ್ಯ ಗುಂಜಳ್ಳಿ ಎಂಬುವವರ ಮಗನು, ಕೋಟಕ್ ಮಹೀಂದ್ರಾ ಓಲ್ಡ್ ಮ್ಯೂಚಲ್ ಇನ್ಶೂರೆನ್ಸ್ ಲಿಮಿಟೆಡ್. ಮುಂಬೈ ಎಂಬ ವಿಮಾ ಕಂಪನಿಯಲ್ಲಿ 2013 ರ ಮೇ.30 ರಂದು ರೂ.14. 80 ಲಕ್ಷ ರೂ. ಮೊತ್ತದ ಪಾಲಿಸಿ ಮಾಡಿಸಿ, ರೂ.19,132 ಗಳ ವಿಮಾ ಕಂತು ಪಾವತಿಸಿದ್ದರು.  ಪಾಲಿಸಿದಾರರ ತಂದೆ ಭೀಮಪ್ಪ ಗುಂಜಳ್ಳಿ ನಾಮಿನಿ ಆಗಿದ್ದರು.   ಭೀಮಪ್ಪ ಅವರ ಮಗ ಅದೇ 2013ರ ಜುಲೈ.10 ರಂದು ಹೃದಯಾಘಾತದಿಂದ ಗಂಗಾವತಿಯಲ್ಲಿ ಮರಣ ಹೊಂದಿದರು. ಇದಾದ ಬಳಿಕ ಭೀಮಪ್ಪ, ತನ್ನ ಮಗನ ಪಾಲಿಸಿಯ ವಿಷಯ ತಿಳಿದು,  ವಿಮಾ ಕಂಪನಿಗೆ ವಿಷಯ ತಿಳಿಸಿ, ಅವರು ಕಳುಹಿಸಿದ ಕ್ಲೇಂ ಫಾರ್ಮನ್ನು ತುಂಬಿ ಸಲ್ಲಿಸಿದರು. ವಿಮಾ ಕಂಪನಿಯು 2014 ರ ಮಾರ್ಚ್ 13 ರಂದು ಭೀಮಪ್ಪ ಅವರಿಗೆ ಪತ್ರ ಬರೆದು ತಮ್ಮ ಮಗನು ಪಾಲಿಸಿ ಮಾಡಿಸುವ ಸಮಯದಲ್ಲಿ ಉದ್ಯೋಗ ಮತ್ತು ಆದಾಯದ ನಿಜ ಸ್ವರೂಪವನ್ನು ತಿಳಿಸದೇ ಇರುವುದರಿಂದ ಪಾಲಿಸಿಯ ಹಣವನ್ನು ನೀಡಲಾಗುವುದಿಲ್ಲ ಎಂದು ತಿಳಿಸಿ, ಕ್ಲೇಂ ಅರ್ಜಿಯನ್ನು ತಿರಸ್ಕರಿಸಿದರು.  ವಿಮಾ ಪಾಲಿಸಿಯ ಮೊತ್ತ ದೊರಕಿಸಿಕೊಡುವಂತೆ ಭೀಮಪ್ಪ ಅವರು ಕೊಪ್ಪಳದ ಗ್ರಾಹಕರ ವೇದಿಕೆ ಮೊರೆ ಹೋಗಿದ್ದರು.
      ಗ್ರಾಹಕರ ವೇದಿಕೆ ನೀಡಿದ ಸಮನ್ಸ್‍ಗೆ ಕಂಪನಿಯು ತಮ್ಮ ವಕೀಲರ ಮೂಲಕ ಹಾಜರಾಗಿ, ಭೀಮಪ್ಪ ಅವರ ಮಗನು ಪಾಲಿಸಿ ಪಡೆಯುವ ಸಮಯದಲ್ಲಿ ನೀಡಿದ ಮಾಹಿತಿಯು ಸರಿಯಾಗಿದೆಯೆಂದು ನಂಬಿ ಪಾಲಿಸಿ ವಿತರಿಸಲಾಗಿತ್ತು. ಆದರೆ ಡೆತ್ ಕ್ಲೇಮ್ ಅರ್ಜಿಯನ್ನು ಪರಿಶೀಲಿಸುವ ಸಮಯದಲ್ಲಿ ಮಾತ್ರವೇ ಅವರು, ಬಿಪಿಎಲ್ ರೇಷನ್ ಕಾರ್ಡ್ ಹೊಂದಿದ್ದರೂ ಸಹ ಪ್ರಪೋಸಲ್ ಫಾರ್ಮ್‍ನಲ್ಲಿ ವಾರ್ಷಿಕ ಆದಾಯ ರೂ.3.00 ಲಕ್ಷ ಎಂದು ನಮೂದಿಸಿ ಪಾಲಿಸಿ ಪಡೆದಿರುತ್ತಾರೆ. ಅಲ್ಲದೇ ಮಗನು ವಿದ್ಯಾರ್ಥಿಯಾಗಿದ್ದು, ಸುಳ್ಳು ಮಾಹಿತಿಯನ್ನು ನೀಡಿ ಫ್ರಪೋಸಲ್‍ನಲ್ಲಿ ನಮೂದಿಸಿದ್ದಾರೆ. ಈ ಕಾರಣದಿಂದಾಗಿಯೇ ಕ್ಲೇಮ್ ಅರ್ಜಿಯನ್ನು ತಿರಸ್ಕರಿಸಲಾಗಿದ್ದು, ತಮ್ಮಿಂದ ಯಾವುದೇ ಸೇವಾ ನ್ಯೂನ್ಯತೆಯಾಗಿಲ್ಲ ಎಂದು ಕಂಪನಿಯು ವಾದ ಸಲ್ಲಿಸಿತು.
     ಪ್ರಕರಣದ ವಿಚಾರಣೆ ನಡೆಸಿದ ವೇದಿಕೆಯ ಅಧ್ಯಕ್ಷೆ ಏಕತಾ ಹೆಚ್.ಡಿ ಹಾಗೂ ಸದಸ್ಯರಾದ ಸುಜಾತಾ ಅಕ್ಕಸಾಲಿ ಅವರು, ಕಂಪನಿಯ ಏಜೆಂಟರು ಪಾಲಿಸಿಯನ್ನು ಮಾಡಿಸುವ ಸಂದರ್ಭದಲ್ಲಿ ಉದ್ಯೋಗ ಮತ್ತು ಆದಾಯದ ಮೂಲವನ್ನು ಪರಿಶೀಲಿಸದೇ ಪಾಲಿಸಿಯನ್ನು ವಿತರಿಸಿರುವುದು ಕಂಪನಿಯ ತಪ್ಪಾಗಿದೆ. ಹಾಗೂ ಕೇವಲ ಬಿ.ಪಿ.ಎಲ್ ಕಾರ್ಡ್ ಹೊಂದಿದ್ದರು ಎಂಬುವುದರ ಆಧಾರದ ಮೇಲೆ ಪಾಲಿಸಿಯ ಹಣವನ್ನು ನೀಡಲು ನಿರಾಕರಿಸಿರುವುದು ಕೂಡಾ ಕಂಪನಿಯ ಸೇವಾ ನ್ಯೂನ್ಯತೆಯಾಗಿದೆ ಎಂದು ಪರಿಗಣಿಸಿ, ಕಂಪನಿಯು ಭೀಮಪ್ಪ ಅವರಿಗೆ ಪಾಲಿಸಿಯ ಹಣ ರೂ.14,80,000 ಗಳನ್ನು ಬೋನಸ್ ಮತ್ತು ಲಾಭಾಂಶದೊಂದಿಗೆ ಹಾಗೂ ಸೇವಾ ನ್ಯೂನ್ಯತೆಗೆ ಪರಿಹಾರವಾಗಿ ರೂ.5,000 ಗಳನ್ನು, ಪ್ರಕರಣ ಖರ್ಚು ರೂ.1,500 ಗಳನ್ನು ಆದೇಶವಾದ ಒಂದು ತಿಂಗಳೊಳಗಾಗಿ ಪಾವತಿಸುವಂತೆ ಆದೇಶಿಸಿದೆ. ಅಲ್ಲದೆ, ಇದಕ್ಕೆ ತಪ್ಪಿದಲ್ಲಿ ಈ ಮೊತ್ತದ ಮೇಲೆ ವಾರ್ಷಿಕ ಶೇಕಡಾ 12 ರಷ್ಟು ಬಡ್ಡಿಯನ್ನು ಪ್ರಕರಣ ದಾಖಲಾದ ದಿನಾಂಕದಿಂದ ಪೂರ್ತಿ ಹಣ ಸಂದಾಯವಾಗುವವರೆಗೂ ಪಾವತಿಸುವಂತೆ ಆದೇಶಿಸಿದೆ.
Post a Comment